काठमाडौँ : टी- २० त्रिकोणात्मक सिरिजको उपाधिका लागि आज नेपाल र नेदरल्यान्ड्स खेल्दै छन्। आज त्रिवि मैदान कीर्तिपुरमा नेपाल र नेदरल्यान्ड्स बिचको खेल ११:३० बजेदेखि सुरु हुनेछ।
नेपालले घरेलु मैदानमा लगातार तेस्रो पटक त्रिकोणात्मक टी-२० आई सिरिजको उपाधि जित्न चाहन्छ। नेदरल्यान्ड्स ४ खेलमा ५ अङ्कसहित फाइनलमा पुगेको हो। नेपाल ४ खेलमा ४ अङ्कसहित दोस्रो स्थानमा रहेर फाइनल खेल्न लागेको हो।
नेपाल र नेदरल्यान्ड्सबीच ११ टी-२० आई खेल भएका छन् जसमा नेपाल समान ५ खेलमा जित र हार व्यहोरेको छ भने एक खेल नतिजा विहीन छ। त्रिवि मैदान कीर्तिपुरमा नेपाल र नेदरल्यान्ड्सबीच हालसम्म पाँच टी-२० आई खेल भएका छन् जसमा नेपाल ३ खेलमा विजयी भएको छ।
लिग चरणको पहिलो खेलमा नेदरल्यान्ड्सले नेपाललाई दुई रनले हराउँदा दोस्रो खेलमा भने नेपालले नेदरल्यान्ड्सविरुद्ध ६ विकेटको जित दर्ता गरेको थियो।
