काठमाडौँ : ओमानमा जारी एसीसी प्रिमियर कप क्रिकेट प्रतियोगितामा नेपालले कतारलाई २११ रनको लक्ष्य दिएको छ। टस जितेर पहिला ब्याटिङ रोजेको नेपालले २० ओभरमा ७ विकेट गुमाउँदै २११ रन बनाएको थियो।
नेपालका लागि दीपेन्द्रसिंह ऐरीले सर्वाधिक ६४ रन बनाएका थियो। नेपालका लागि ऐरीले कीर्तिमानी खेल प्रदर्शन गरेका छन्। उनले एकै ओभरमा छ छक्का प्रहार गर्दै यसअघि भारतका युवराज सिंहका नाममा रहेको कीर्तिमानको बराबरी गरेका छन्। पारीको अन्तिम ओभरमा बलिङ गर्न कतारका कमरान खान आएका थिए। उक्त ओभरको ६ बलमा ऐरीले ६ छक्का प्रहार गरेका थिए।
यस्तै, आसिफ शेखले ५२ रन, कुशल मल्लले ३५ रन, रोहित पौडेलले १८ रन, कुशल भुर्तेलले १२ रन, गुलशन झाले ५ रन र सन्दीप जोराले ७ रन तथा विवेक यादवले ५ रन बनाएका थिए।
बलिङमा कतारका लागि हिमांशु राठोड र मुसावर शाह सामना ३/३ विकेट तथा अमिर फारुक १ विकेट लिएका थिए।
