काठमाडौँ : नेपाल क्रिकेट संघ (क्यान) ले नेपाल प्रिमियर लिग (NPL) मा सहभागी हुने फ्रेन्चाइज क्लबका मालिकहरू सार्वजनिक गरेको छ। यसअघि बिडिङ प्रक्रियामा सहभागी ९ टिमहरूबाट छानिएका ८ टिमका मालिकहरू आज घोषणा गरिएको हो।
सर्वाधिक ३ करोड ३३ लाखमा बिक्री भएको टिम काठमाडौं स्पोर्टस डेभलपमेन्ट भेन्चर हो। पोखराको टिमको मालिक नेपाल टी-ट्वेन्टी प्रालि रहेको छ भने चितवन राइनोज टिमलाई चितवन मेडिकल कलेजले जितेको हो।
यस्तै, कर्णाली याक्स टिमलाई हिमालयन बिल्डर्स एन्ड इन्जिनियर्स प्रालिले लिएको छ। जनकपुर बेल्ट्स टिमको आधिकारिक संस्थाको रूपमा ड्रिम्स स्पोर्ट्स प्रालि रहेको छ भने लुम्बिनीको मालिकको रूपमा फर्चुना हेल्थ केयर छ। विराटनगर किंग्सलाई एम ए डी कम्पनीले आफ्नो नाममा गरेको छ। अन्त्यमा, सुदूरपश्चिम रोयल्स टिमलाई एम्पायर स्पोर्ट्सले सम्हाल्ने घोषणा गरिएको छ।
आजै बिहान काठमाडौं टिमले आफ्नो लोगो सार्वजनिक गरेको छ भने कर्णालीले हिजो लोगो सार्वजनिक गर्दै ज्ञानेन्द्र मल्ललाई कप्तान घोषणा गरिसकेको छ।
मंसिर १५ देखि पुष ६ गतेसम्म २१ दिन सञ्चालन हुने नेपाल प्रिमियर लिगको पहिलो संस्करणमा ३२ खेल हुनेछ। टिमहरूको खेलाडी चयनका लागि अक्सन असोज २० गते हुने क्यानले यसअघि नै जानकारी गराइसकेको छ।
