काठमाडौँ : नेपालले कप्तान रोहित पौडेलको उत्कृष्ट अलराउन्ड प्रदर्शनको मद्दतले सिरिजमा ओमानलाई पराजित गर्दै उपाधि जित्ने सम्भावना जीवित राखेको छ। त्रिकोणात्मक टी-२० अन्तर्राष्ट्रिय सिरिजमा नेपालले ओमानलाई ५६ रनले पराजित गरेको छ।
१ सय ५८ रनको लक्ष्य पछ्याएको ओमान १७.५ ओभरमा मात्र १ सय १ रनमा अलआउट भयो। ओमानका लागि जिशान मकसुदले ३५ रन र अकिब इलियासले २२ रन बनाएका थिए। बलिङमा नेपालका लागि कुशल भुर्तेलले ३ विकेट तथा रिजन ढकाल, रोहित पौडेल र सन्दीप लामिछानेले समान २/२ विकेट लिएका थिए।
यसअघि टस हारेर ब्याटिङ गरेको नेपालले २० ओभरमा ७ विकेट गुमाउँदै १ सय ५७ रन बनाएको थियो। नेपालका लागि कप्तान रोहित पौडेलले ४४ बलमा २ चौका र ४ छक्का प्रहार गर्दै अविजित ५६ रन बनाएका थिए। साथै, देव खनालले १८ रन,आसिफ शेखले १६ रन र अनिल साहले ११ रन बनाएका थिए। बलिङमा ओमानका फयाज बटले ३ विकेट लिएका थिए।
नेपालले सिरिजमा चार खेल खेलेको छ। जसमा २ खेल जित्दै ४ अंकसहित नेटरनरेटका आधारमा शीर्ष स्थानमा छ। क्यानडा ४ अंकसहित दोस्रो स्थानमा छ भने ओमान २ अंकसहित पुछारमा छ। अब बिहीबार ओमान र क्यानडाबीचको खेलमा ओमान विजयी भएमा नेटरनरेटका आधारमा नेपाल च्याम्पियन बन्ने सम्भावना रहेको छ।
