काठमाडौँ : त्रिदेशीय टी–२० क्रिकेट शृङ्खलामा क्यानडाले ओमानलाई ५ विकेटले पराजित गर्दै उपाधि जितेको छ। शृङ्खलामा क्यानडाले ४ खेलमा ६ अङ्क जोड्दै शीर्ष स्थानमा रह्यो भने नेपालले ४ खेलमा ४ अङ्कसहित दोस्रो स्थान हासिल गर्यो र ओमान २ अङ्कसहित अन्तिम स्थानमा रह्यो।
ओमानले दिएको ८३ रनको लक्ष्य क्यानडाले १४ ओभर १ बलमा ५ विकेट गुमाएर पूरा गर्यो। क्यानडाका लागि निकोलस किर्तोनले २० रन बनाएका थिए। बलिङमा ओमानका कलीमुल्लाह र अकिब इलियासले समान २ विकेट लिएका थिए।
यसअघि ओमानले टस जितेर ब्याटिङ गर्ने निर्णय गरेको थियो। तर ओमान १९ ओभर ४ बलमा ८२ रनमै अलआउट भयो। ओमानका लागि अकिब इलियासले ३५ रन बनाएका थिए। यस्तै, बलिङमा क्यानडाका अखिल कुमार र प्रभीन कुमारले समान ३ विकेट लिएका थिए।
