काठमाडौँ : फिफा विश्वकप फुटबल २०२६ को अन्तिम १६ खेलमा स्विट्जरल्यान्डले पेनाल्टी सुटआउटमा कोलम्बियालाई ४–३ ले हराउँदै क्वार्टरफाइनलमा प्रवेश गरेको छ।
क्यानडाको भ्यानकुभरस्थित बीसी प्लेस स्टेडियममा भएको खेलमा निर्धारित ९० मिनेट र त्यसपछिको ३० मिनेट अतिरिक्त समयमा समेत दुवै टिमले गोल गर्न नसकेपछि नतिजा पेनाल्टी सुटआउटबाट टुंगिएको थियो। खेल ०–० गोलले बराबरीमा टुंगिएको थियो।
पेनाल्टी सुटआउटमा स्विट्जरल्यान्डका ग्रानित जाका, जेकेर आम्दुनी, सेड्रिक इटेन र रुबेन वर्गासले सफल स्पट किक गरे भने कोलम्बियाका जुआन क्विन्टेरो, जामिन्टन काम्पाज र लुइस डियाजले गोल जमाए। तर कोलम्बियाका दाभिन्सोन साञ्चेजको प्रयास बारमा ठोकियो, र कुचो एर्नान्देजको किक स्विस गोलरक्षक ग्रेगोर कोबेलले रोकिदिए, जसले स्विट्जरल्यान्डलाई जित सुनिश्चित गरिदियो।
यो जितसँगै स्विट्जरल्यान्डले सन् १९५४ यता पहिलोपटक विश्वकप क्वार्टरफाइनलमा पाइला टेकेको हो। यस अघिका पछिल्ला तीन विश्वकपमा अन्तिम १६ सम्म पुगेको स्विट्जरल्यान्ड त्यहाँबाटै बाहिरिँदै आएको थियो।
अर्कातर्फ, आफ्नो दोस्रो विश्वकप क्वार्टरफाइनल र सन् २०१४ यता पहिलोपटक सो चरणमा पुग्ने प्रयासमा रहेको कोलम्बिया लगातार दोस्रोपटक पेनाल्टीबाटै विश्वकपबाट बाहिरिएको छ। यसअघि सन् २०१८ मा उनीहरू इङ्ल्यान्डसँग अन्तिम १६ मै पेनाल्टीमा हारेका थिए।
अब स्विट्जरल्यान्डले सेमिफाइनल प्रवेशका लागि आगामी शनिबार अमेरिकाको कान्सास सिटीमा गत विजेता अर्जेन्टिनासँग भिड्नेछ, जसले मंगलबार नाटकीय खेलमा इजिप्टलाई ३–२ ले पराजित गर्दै क्वार्टरफाइनल पक्का गरेको थियो।
