काठमाडौँ : नेपाल प्रिमियर लिग (एनपिएल) को आसन्न सिजनका लागि काठमाडौँ गोर्खाजले श्रीलङ्काका अन्तर्राष्ट्रिय अलराउन्डर सहान अराच्चिगेलाई टोलीमा अनुबन्ध गरेको छ।

बायाँहाते ब्याटर तथा दायाँहाते अफ-स्पिनर अराच्चिगेले श्रीलङ्काको राष्ट्रिय टोलीबाट अन्तर्राष्ट्रिय क्रिकेट खेलिसकेका छन्। टोलीलाई सन्तुलित र बलियो बनाउन काठमाडौँ गोर्खाजले उनलाई विदेशी खेलाडीका रूपमा भित्र्याएको हो। काठमाडौँ गोर्खाजले यसअघि नै भारतका चर्चित विकेटकिपर तथा ब्याटर केएस भरतलाई टोलीमा अनुबन्ध गरिसकेको छ।

नेपाल क्रिकेट सङ्घ (क्यान) को आयोजनामा हुन लागेको नेपाल प्रिमियर लिग (एनपिएल) कात्तिक ९ गतेदेखि काठमाडौँमा सुरु हुँदैछ। आगामी सिजनका लागि विभिन्न टोलीहरूले विदेशी र स्वदेशी उत्कृष्ट खेलाडीहरूलाई अनुबन्ध गर्ने क्रमलाई तीव्र बनाएका छन्।