काठमाडौँ : नेपाली राष्ट्रिय टोलीका पुरुष तथा महिला खेलाडीहरूले भुटानमा आयोजना हुने टी–२० शृङ्खलामा भाग लिने भएका छन्। ‘भुटान क्रिकेट फेस्टिभल २०२६–२७’ को तालिका अनुसार आगामी डिसेम्बरमा नेपाल ‘ए’ पुरुष टोली र जनवरीमा महिला टोलीले प्रतिस्पर्धा गर्ने तय भएको छ।
गेलेफुस्थित गेलेफु इन्टरनेसनल क्रिकेट ग्राउन्डमा डिसेम्बर ४ देखि १३ सम्म सञ्चालन हुने पुरुष टी–२०आई शृङ्खलामा नेपाल ‘ए’ ले आयोजक भुटान, बहराइन, थाइल्यान्ड र माल्दिभ्ससँग प्रतिस्पर्धा गर्नेछ।
उक्त प्रतियोगिता सकिएलगत्तै डिसेम्बर १५ देखि २४ सम्म भुटान, बहराइन र माल्दिभ्सबीच टी–२०आई त्रिकोणात्मक शृङ्खला सञ्चालन हुनेछ। त्यसपछि डिसेम्बर २६ देखि ३० सम्म आयोजक भुटान र माल्दिभ्सबीच मैत्रीपूर्ण टी–२०आई शृङ्खला आयोजना गरिनेछ।
