काठमाडौँ : नेको इन्स्योरेन्स कम्पनी लिमिटेडले चालु आर्थिक वर्ष २०८०/८१ को दोस्रो त्रैमासको वित्तीय विवरण सार्वजनिक गरेको छ। कम्पनीले सार्वजनिक गरेको वित्तीय विवरण अनुसार कम्पनीको अधिकांश सूचकमा वृद्धि देखिएको छ।
कम्पनीले यस आर्थिक वर्षको पुस मसान्तसम्ममा २२ करोड १२ लाख रुपैयाँ खुद नाफा गरेको छ। गत आर्थिक वर्षको सोही अवधिमा कम्पनीले १९ करोड २० लाख रुपैयाँ नाफा आर्जन गरेको थियो। कम्पनीले एकै वर्षमा १५.२० प्रतिशतले वृद्धि गरेको देखिन्छ।
कम्पनीको कुल बीमाशुल्क आर्जन गत वर्षको तुलनामा सामान्यले वृद्धि भएको छ। गत वर्षको तुलनामा कम्पनीको कुल बीमाशुल्क आर्जन ६१ करोड ६० लाख रुपैयाँ पुगेको छ। गत आर्थिक वर्षको पुस मसान्तसम्ममा कम्पनीले ५८ करोड ६ लाख रुपैयाँ कुल बीमाशुल्क आर्जन गर्न सफल भएको थियो।
कम्पनीले यस आर्थिक वर्षको पुस मसान्तसम्ममा बीमा कोषमा ३ अर्ब ६३ करोड ३५ लाख ५१ हजार रुपैयाँ संचित गरेको छ भने जगेडा कोषमा ३६ करोड र महाविपत्ति कोषमा १२ करोड रुपैयाँ संचिती गरेको छ।
समीक्षा अवधिसम्म कम्पनीले २ करोड ५७ लाख रुपैयाँ अभिकर्ता कमिसन मार्फत खर्चिएको छ। अघिल्लो आर्थिक वर्षको यही अवधिसम्म कम्पनीले २ करोड ९० लाख रुपैयाँ खर्चिएको थियो। कम्पनीको हालको चुक्ता पुँजी २ अर्ब १ करोड रहेको छ। कम्पनीको प्रतिशेयर आम्दानी २१.९९ रुपैयाँ र प्रति शेयर नेटवर्थ २३०.०१ रुपैयाँ रहेको छ।
