काठमाडौँ : राष्ट्रिय तथ्याङ्क कार्यालयले चालु आर्थिक वर्ष २०८०/८१ मा नेपालले ३.५४ प्रतिशतको आर्थिक वृद्धिदर हासिल गर्ने अनुमान सार्वजनिक गरेको छ। चालु आवको बजेटमार्फत सरकारले छ प्रतिशतको आर्थिक वृद्धि हासिल गर्ने लक्ष्य राखेकोमा लक्ष्यको आधा बराबर मात्रै वृद्धिदर हासिल हुने अनुमान तथ्याङ्क कार्यालयले सार्वजनिक गरेको हो।
तथ्याङ्क कार्यालयले आज आव २०८०/८१ को वार्षिक राष्ट्रिय लेखा तथ्याङ्क सार्वजनिक गर्दै यस्तो अनुमान सार्वजनिक गरेको हो। “चालु आव २०८०/८१ मा आर्थिक वृद्धिदर आधारभूत मूल्यमा ३.५४ प्रतिशत र उपभोक्ता मूल्यमा ३.८७ प्रतिशत हुने प्रारम्भिक अनुमान गरिएको छ”, कार्यालयद्वारा जारी विज्ञप्तिमा भनिएको छ, “चालु आव २०८०/८१ मा उपभोक्ता मूल्यमा आधारित मुलुकको अर्थतन्त्रको आकार रु ५७ खर्ब चार अर्ब पुग्ने अनुमान छ।” त्यसैगरी, गत आव २०७९/८० मा नेपालको अर्थतन्त्रको आकार रु ५३ खर्ब ४८ अर्ब बराबर रहेको पनि तथ्याङ्क कार्यालयले जनाएको छ।
तथ्याङ्क कार्यालयले चालु आवमा कृषि क्षेत्रको वृद्धिदर प्रक्ष्येपण ३.०५ र गैरकृषि क्षेत्रको वृद्धि ३.७५ प्रतिशत रहने अनुमान गरेको छ। त्यसैगरी, प्राथमिक क्षेत्र ३ प्रतिशत, द्वितीय क्षेत्र १.२ प्रतिशत र सेवा क्षेत्र ४.५ प्रतिशत रहेको छ।
चालु आवमा प्रतिव्यक्ति कूल गार्हस्थ्य उत्पादन अमेरिकी डलर १ हजार ४ सय ३४ हुने प्रारम्भिक अनुमान गरिएको छ भने प्रतिव्यक्ति कूल राष्ट्रिय आय अमेरिकी डलर १ हजार ४ सय ४५ रहने अनुमान गरिएको छ। चालु आवमा विभिन्न क्षेत्रको मूल्य अभिवृद्धि वृद्धिदर हेर्दा स्वास्थ्य तथा सामाजिक कार्यतर्फ ५.५२, शिक्षातर्फ २.७१, सार्वजनिक प्रशासन तथा रक्षातर्फ ४.४९, प्रशासनिक तथा सहयोगी सेवातर्फ ४.०४, पेसागत वैज्ञानिक तथा प्राविधिक क्रियाकलापतर्फ ४.१५ प्रतिशतको वृद्धिदर अनुमान गरिएको छ।
त्यसैगरी, घरजग्गा कारोबारतर्फ २.९८, वित्तीय तथा बीमा क्षेत्रतर्फ ७.८०, सूचना तथा सञ्चारतर्फ ४.९१ प्रतिशत, आवास तथा भोजन सेवातर्फ ८१.८४ प्रतिशत र यातायात तथा भण्डारण सेवातर्फ ११.८९ प्रतिशतको वृद्धि अनुमान गरिएको छ।
थोक, खुद्रा व्यापार, गाडी तथा मोटरसाइकल मर्मत सेवातर्फ ०.१६, पानी आपूर्ति, ढल व्यवस्थापनलगायत क्षेत्रमा २.८०, विद्युत् ग्यास तथा वातानुकूलित आपूर्ति सेवातर्फ १७.४४, खानी तथा उत्खननतर्फ २.३१, कृषि, वन तथा मत्स्यतर्फ ३.०५ प्रतिशत वृद्धि रहने अनुमान गरिएको छ।
चालु आवमा उद्योग र निर्माण क्षेत्रको मूल्य अभिवृद्धिदर ऋणात्मक रहने अनुमान गरिएको छ। उद्योग क्षेत्र एक दशमलव ६० र निर्माण क्षेत्र दुई दशमलव ०७ ले ऋणात्मक रहने कार्यालयले जनाएको छ। राष्ट्रिय लेखा अनुमान गर्न संयुक्त राष्ट्रसङ्घ, युरोपियन युनियन, विश्व बैंक, अन्तर्राष्ट्रिय मुद्रा कोष, आर्थिक विकास तथा सहयोगका लागि सङ्गठनजस्ता अन्तर्राष्ट्रिय संस्थाद्वारा संयुक्तरुपमा विकास गरेको राष्ट्रिय तथ्याङ्क कार्यालयले राष्ट्रिय लेखा तथ्याङ्क अनुमान गरी प्रकाशन गर्दछ।
