काठमाडौँ : झ्याप्ले खोलामा पहिरोका कारण पुरिएका बसहरूबाट १५ जनाको शव निकालिएको छ। फेला परेका शव गोरखाबाट काठमाडौंतर्फ आउँदै गर्दा सम्पर्कविहीन भएको बसका यात्रु हुन सक्ने प्रहरीले अनुमान गरेको छ ।
पहिरो पन्छाउने क्रममा एउटा बस पुरिएको अवस्थामा फेला परेको थियो। जसलाई अहिले निकाल्ने प्रयास भइरहेको छ। फेला परेको बसको आधा भाग मात्र देखिएकोले बस नम्बर पहिचान हुन सकेको छैन।
यस उद्धार कार्यमा सशस्त्र प्रहरी, नेपाली सेना र नेपाल प्रहरीको टोली सक्रिय रूपमा जुटिरहेको छ। यसअघि पनि झ्याप्ले खोलामै दुई वटा बस पुरिएको अवस्थामा फेला परेको थियो। जहाँबाट १४ जनाको शव निकालिएको थियो।
