काठमाडौँ : दही स्वास्थ्यका लागि लाभदायक हुन्छ, तर यसलाई सीमित मात्रामा खानु महत्वपूर्ण छ। यदि शरीर स्वस्थ छ र तपाईँले सीमित रूपमा दही खाइरहनुभएको छ भने यसले स्वास्थ्यमा नकारात्मक असर गर्दैन। तर, राति दही खानाले कफ बनाउने सम्भावना हुन्छ, जसले गर्दा केही व्यक्तिमा स्वास्थ्य समस्याहरू देखिन सक्छन्। त्यसैले राति दही खानु स्वास्थ्यका लागि हानिकारक हुन सक्छ भने दिनभरि सीमित मात्रामा खाँदा यसले शरीरलाई पोषण पुर्याउँछ।
दहीमा प्रोटिन, भिटामिन र खनिज पदार्थ पाइन्छ, जसले शरीरलाई आवश्यक पोषक तत्व पुर्याउँछ। यहाँ दैनिक दही खाँदा शरीरमा हुने फाइदाहरूको चर्चा गरिएको छ।
- प्रोटिनको स्रोत:
दही प्रोटिनको राम्रो स्रोत हो। शरीरका मांसपेशी, छाला, कपाल, नङलाई आवश्यक प्रोटिन यसबाट प्राप्त गर्न सकिन्छ। १०० ग्राम दहीले करिब ११.१ ग्राम प्रोटिन प्रदान गर्छ, जसले शरीरको विकासमा मद्दत पुर्याउँछ। - पाचनलाई सघाउने:
दहीले आन्द्रामा पाइने लाभदायक ब्याक्टेरियाको संख्या कायम राख्न मद्दत गर्दछ। यसले पाचन प्रणालीलाई स्वस्थ राख्छ र कब्जियत, ग्यास, पेट फुल्ने जस्ता समस्यामा राहत पुर्याउँछ। - क्याल्सियमको राम्रो स्रोत:
दहीमा प्रशस्त मात्रामा क्याल्सियम पाइन्छ, जसले हड्डीलाई मजबुत बनाउन सहयोग गर्छ। शरीरमा क्याल्सियमको कमीले हड्डी कमजोर हुन्छ, जसलाई पूर्ति गर्न दही उपयोगी छ। - भिटामिन बी १२ को स्रोत:
दहीमा भिटामिन बी १२ थोरै मात्रामा पाइन्छ, जुन स्नायु प्रणाली, मस्तिष्क र रगतको लागि आवश्यक हुन्छ। यो भिटामिन शरीरको ऊर्जा स्तरलाई बढाउन मद्दत गर्छ। - थकान हटाउन सहयोगी:
यदि तपाईँलाई थकान महसुस हुन्छ भने दहीले ऊर्जा र ताजगी प्राप्त गर्न सहयोग गर्छ। यसले शारीरिक र मानसिक थकान हटाउँछ।
कति मात्रामा खान उचित?
प्रत्येक दिन सानो मात्रामा दही खानु स्वास्थ्यका लागि लाभदायक हुन्छ। यदि तपाईँले दहीबाट हुने फाइदाहरू लिन चाहनुहुन्छ भने यसलाई बिहान वा दिउँसो खाने बानी बसाल्न सक्नुहुन्छ, तर अत्यधिक सेवन गर्नु उचित मानिँदैन।
