काठमाडौं : बैंकिङ प्रणालीमा तरलता धेरै भएपछि नेपाल राष्ट्र बैंकले बुधबार १ खर्ब रुपैयाँ तानेको छ। केन्द्रीय बैंकले निक्षेप संकलन उपकरणको प्रयोग गरी बैंकिङ प्रणालीबाट यो रकम तानेको हो।
यसका लागि राष्ट्र बैंकले बुधबार अपराह्न ३ बजे अनलाइन बोलकबोल आयोजना गरेको थियो।
बोलकबोल प्रक्रियामा २५ वटा बैंक तथा वित्तीय संस्थाहरूबाट ६६ वटा आवेदन प्राप्त भएका थिए, जसमा बैंक तथा वित्तीय संस्थाहरूले राष्ट्र बैंकलाई २ खर्ब ७ अर्ब १० करोड रुपैयाँ उपलब्ध गराउन आवेदन दिएका थिए। तर, राष्ट्र बैंकले केवल १ खर्ब रुपैयाँ मात्र तानेको छ।
यो २१ दिनको अवधिको लागि निक्षेप संकलन उपकरण प्रयोग गरिएको थियो, जसको साँवा-ब्याज राष्ट्र बैंकले मंसिर १२ गते बैंक तथा वित्तीय संस्थाहरूलाई भुक्तानी गर्नेछ। यो रकमको औसत ब्याजदर २.७२ प्रतिशत कायम भएको छ।
