काठमाडौँ : नेपाल चेम्बर अफ कमर्सले मुलुकको कर प्रणालीलाई लगानीमैत्री बनाउन आग्रह गरेको छ। सोमबार आयोजित "राजश्व नीति र कर प्रणाली" विषयक अन्तरक्रिया कार्यक्रममा चेम्बरले सरकार र निजी क्षेत्रबीच सहकार्य गर्दै सरल, पारदर्शी र स्थिर कर नीति निर्माण गर्नुपर्नेमा जोड दिएको हो।
कार्यक्रममा नेपाल चेम्बर अफ कमर्सका अध्यक्ष कमलेश कुमार अग्रवालले मुलुकको आर्थिक विकासका लागि कर प्रणालीलाई लगानीसँग जोड्न आवश्यक रहेको बताए। उनका अनुसार “सरल र सहज कर नीति तथा प्रशासनले लगानीमैत्री वातावरण सिर्जना गर्छ।
जब निजी क्षेत्रले पर्याप्त नाफा कमाउन सक्छ तबमात्र राजश्व संकलनको आधार बलियो हुन्छ।” उनले पुँजी निर्माण, रोजगारी सिर्जना र उत्पादन वृद्धि हुनेगरी नीति निर्माण गर्नुपर्नेमा पनि जोड दिए।
आन्तरिक राजश्व विभागका महानिर्देशक रामप्रसाद आचार्यले सरकारले पनि कर प्रणालीलाई लगानीसँग जोड्ने पहल गरिरहेको उल्लेख गरे। “अर्थतन्त्रलाई सुधार गर्दै लगानीका लागि सकारात्मक वातावरण बनाउने कार्यमा सरकार सक्रिय छ।” उनले भने। महानिर्देशक आचार्यले सरकार र निजी क्षेत्रको सहकार्यले मात्रै आर्थिक लक्ष्य पूरा गर्न सकिने बताए।
कार्यक्रममा निजी क्षेत्रका प्रतिनिधि र अन्य सरोकारवालाहरूले कर प्रणालीमा रहेका चुनौतीहरूबारे विचार-विमर्श गर्दै सुधारका लागि सिफारिस गरेका थिए। चेम्बरले कर प्रणालीलाई सरल र दिगो बनाउन आग्रह गर्दै निजी क्षेत्रको भूमिका सशक्त बनाउन सरकारलाई सुझाव दिएको छ।
