काठमाडौं : नेप्लिज यङ्ग इन्टरप्रेनियर्स फोरम (एनवाईईएफ) काठमाडौं च्याप्टरले ग्लोबल आईएमई बैंक एनवाईईएफ स्टार्टअप अवार्ड्स ४.० का लागि आयोजित ओरिएन्टेसन कार्यक्रम सफलतापूर्वक सम्पन्न गरेको छ। मंसिर ७ गते पाटन कलेज फर प्रोफेसनल स्टडिजमा आयोजना गरिएको यो कार्यक्रमले नेपालको उद्यमशीलता क्षेत्रको सम्भावना उजागर गर्न महत्वपूर्ण योगदान पुर्याएको छ।
यस वर्षको प्रतियोगिताका लागि देशभरका १ सय ७० भन्दा बढी स्टार्टअपहरूले आवेदन दिएका छन्। ओरिएन्टेसन कार्यक्रममा प्रतियोगिताको प्रक्रिया, मेन्टरशिप अवसर र उद्यमहरूको वृद्धिका सम्भावनाबारे सहभागीहरूलाई जानकारी प्रदान गरिएको थियो।
कार्यक्रमको उद्घाटन एनवाईईएफ काठमाडौं च्याप्टरका अध्यक्ष अभिमन्यु गोल्छाको स्वागत सम्बोधनबाट भएको थियो। उनले स्टार्टअपलाई सफल बनाउन यस्ता प्लेटफर्महरूको भूमिका महत्वपूर्ण रहेको बताएका थिए। साथै प्रतियोगिताका संरचनाबारे जानकारी दिँदै अध्यक्ष सन्दीप शर्माले मेन्टरशिप, नेटवर्किङ र पुरस्कारको अवसरको महत्त्वलाई स्पष्ट पारे।
एनवाईईएफ नेशनल गभर्निङ काउन्सिलकी कार्यकारी सदस्य बिलाषा श्रेष्ठले समापन सम्बोधन गर्दै नेपालका युवा उद्यमीहरूलाई यस्ता कार्यक्रमले नयाँ उचाइमा पुर्याउन सहयोग गर्ने बताइन्।
कार्यक्रमको अर्को आकर्षण बिजनेस टु बिजनेस (B2B) सेसन थियो, जसले समान विचारधाराका उद्यमी र सम्भावित साझेदारहरूसँग नेटवर्किङ गर्ने उत्कृष्ट अवसर प्रदान गर्यो। कार्यक्रम हाई-टी सेसनसहित अनौपचारिक अन्तरक्रिया र नेटवर्किङका लागि अनुकूल वातावरणमा सम्पन्न भयो।
यो ओरिएन्टेसनले नेपालमा स्टार्टअप संस्कृति सुदृढ गर्न र नवप्रवर्तनलाई प्रोत्साहन गर्न महत्त्वपूर्ण भूमिका खेल्ने विश्वास गरिएको छ।
