काठमाडौं : देशमा पश्चिमी वायुको सामान्य प्रभाव रहेको मौसम पूर्वानुमान महाशाखाले जनाएको छ।
आज शनिबार कोशी प्रदेश, गण्डकी प्रदेश र कर्णाली प्रदेशका पहाडी भू-भागमा आंशिक बदली रहनेछ भने बाँकी भू-भागमा मौसम मुख्यतया सफा रहनेछ। कोशी र गण्डकी प्रदेशका उच्च पहाडी तथा हिमाली भू-भागका केही स्थानमा हल्का हिमपातको सम्भावना छ।
आइतबार पनि कोशी प्रदेश, मधेस प्रदेश, गण्डकी प्रदेश र कर्णाली प्रदेशका पहाडी क्षेत्रहरूमा आंशिक बदली हुने अनुमान गरिएको छ। तर, अधिकांश भू-भागमा मौसम सफा रहनेछ। कर्णाली प्रदेशको उच्च पहाडी र हिमाली भू-भागका केही स्थानमा हल्का हिमपातको सम्भावना यथावत छ।
हल्का हिमपातले पर्यटन तथा पर्वतारोहण गतिविधिमा आंशिक प्रभाव पार्न सक्ने भएकाले सतर्कता अपनाउन मौसमविद्हरूले सुझाव दिएका छन्। विशेषगरी उच्च पहाडी तथा हिमाली क्षेत्रमा यात्रा गर्दा मौसमको अद्यावधिक जानकारी लिन र आवश्यक तयारीसहित यात्रा गर्न सुझाव दिइएको छ।
