काठमाडौँ : ओखर प्रोटिनको सबैभन्दा राम्रो श्रोत मात्र होइन, यो जिउबाट हानिकारक कोलेस्ट्रोल हटाउन पनि सहयोगी हुन्छ। यसमा भरपूर मात्रामा पाइने ओमेगा थ्री फ्याट्टी अम्लले एन्टी-इन्फ्लामेटरी गुण प्रदान गर्ने भएकाले उच्च रक्तचापको जोखिम कम गर्न सकिन्छ।
हालैको एक अध्ययनले नियमित रूपमा ओखरको सेवन गर्ने महिलामा शारीरिक समस्याहरू कम देखिने गरेको खुलासा गरेको छ। साथै, नियमित ओखरको सेवनले छिट्टै बुढ्यौलीको लक्षण देखा पर्नबाट पनि बचाउँछ।
ओखरमा पाइने पोलीअनस्याचुरेटेड फ्याट र वनस्पतिजन्य ओमेगा थ्री फ्याट्टी एसिड (जसलाई अल्फा लिनोलेनिक एसिड वा एएलए भनिन्छ) स्वास्थ्यका लागि निकै लाभदायक हुन्छ। उदाहरणका लागि, २८.५ ग्राम ओखरले लगभग २.५ ग्राम एएलए प्रदान गर्न सक्छ।
अमेरिकाको ब्रिघम एण्ड विमन हस्पिटल र हार्वर्ड मेडिकल स्कूलका प्राध्यापक फ्रान्सिन ग्रोडस्टिनका अनुसार धेरैजसो अध्ययन उमेरसँगै हुने मधुमेह र मुटुरोगजस्ता समस्यामा केन्द्रित हुन्छन्। तर बुढ्यौली रोक्नका उपायबारे गरिएका अध्ययन कम छन्।
उनले ओखरसँगै फलफूल, सागसब्जीको पर्याप्त सेवन, चिनी र बोसोको सेवन सीमित गर्नु, सोडियम कम खानु र रक्सी सेवन घटाउनु आवश्यक रहेको औँल्याएकी छन्।
पछिल्लो अध्ययन:
जर्नल अफ न्यूट्रिशनमा प्रकाशित एक अध्ययनमा ५५ हजारभन्दा बढी महिलालाई सहभागी गराइएको थियो। शोधकर्ताहरूका अनुसार, जिउलाई जवान राख्न ओखरको सेवन मात्र पर्याप्त हुँदैन। स्वस्थ खानपान, सन्तुलित जीवनशैली र नियमित व्यायाम पनि उत्तिकै महत्त्वपूर्ण हुन्छ।
नोट:
जवान रहन चाहनेहरूले दैनिक सन्तुलित मात्रामा ओखरको सेवन गर्न सक्नेछन्। तर कुनै पनि नयाँ खानपान सुरु गर्नु अघि आफ्नो चिकित्सकसँग परामर्श लिनु उपयुक्त हुन्छ।
