काठमाडौं : नेपाल दूरसञ्चार कम्पनी लिमिटेड (एनटीसी) ले पुस २८ गते आइतबार सत्रौं वार्षिक साधारणसभा गर्ने भएको छ। कम्पनीको पुस ६ गते बसेको सञ्चालक समितिको बैठकले काठमाडौंको प्रदर्शनी मार्गस्थित राष्ट्रिय सभागृहमा बिहान १० बजे सभा बस्ने निर्णय गरेको हो।
सभामा कम्पनीले गत आर्थिक वर्षको मुनाफाबाट शेयरधनीलाई प्रतिशेयर ३० रुपैयाँ नगद लाभांश (कर सहित) वितरण गर्ने प्रस्ताव पेस गर्नेछ।
त्यसैगरी गत आर्थिक वर्षको वार्षिक प्रतिवेदन, वित्तीय विवरणहरू पारित गर्नुका साथै चालू आर्थिक वर्षका लागि लेखापरीक्षकको नियुक्ति र पारिश्रमिक निर्धारण गर्ने विषयमा निर्णय गरिनेछ।
सभा प्रयोजनका लागि कम्पनीले पुस १८ गतेदेखि २८ गतेसम्म बुक क्लोज गर्ने भएको छ। यस आधारमा पुस १७ गतेसम्म शेयरधनी कायम भएका लगानीकर्ताहरूले साधारणसभामा सहभागी हुन र लाभांश प्राप्त गर्न सक्नेछन्।
