काठमाडौं : नेपाल माइक्रो इन्स्योरेन्स कम्पनी (एनएमआईसी) र कामना सेवा विकास बैंक लिमिटेड (केएसबीबी) बीच व्यवसाय विस्तार गर्ने उद्देश्यले सम्झौतापत्रमा हस्ताक्षर भएको छ।
सम्झौतामा इन्स्योरेन्सका प्रमुख कार्यकारी अधिकृत (सीईओ) मृगेन्द्र रिमाल र बैंकका उप महाप्रबन्धक हरिप्रसाद लम्सालले हस्ताक्षर गरे।
कार्यक्रममा सीईओ रिमालले भने "हाम्रो बीमा सेवाहरूलाई अझै सरल र पहुँचयोग्य बनाउने यो सहकार्यले दुवै संस्थालाई नयाँ उचाइमा पुर्याउनेछ। कामना सेवा विकास बैंकसँगको सहकार्यले ग्रामीण तथा अर्ध-शहरी क्षेत्रमा वित्तीय र बीमा सेवाको अभावलाई सम्बोधन गर्न मद्दत पुर्याउनेछ।"
त्यसैगरी उप महाप्रबन्धक लम्सालले भने "ग्राहकहरूको व्यापक वित्तीय आवश्यकतालाई सम्बोधन गर्न यो साझेदारीले नयाँ सम्भावना र अवसरहरू सिर्जना गर्नेछ। बैंक वित्तीय समावेशिताको माध्यमबाट सशक्तिकरणमा केन्द्रित छ, र यो सम्झौताले दुवै संस्थाको सेवाक्षमता बढाउन सहयोग पुर्याउनेछ।"
समारोहमा एनएमआईसीका नायब प्रमुख कार्यकारी अधिकृत अनिलराज गिरि तथा दुवै संस्थाका अन्य पदाधिकारीहरू पनि उपस्थित थिए।
यो सहकार्यले नयाँ व्यापार अवसरहरूको खोजी, प्रक्रिया सुधार र अल्पसंख्यक जनसमुदायलाई लक्षित सेवाहरू प्रदान गर्न विशेष पहलहरू सञ्चालन गर्ने योजना बनाएको छ। यसले ग्रामीण तथा अर्ध-शहरी क्षेत्रमा वित्तीय र बीमा सेवाको पहुँच विस्तार गर्ने विश्वास गरिएको छ।
एनएमआईसीको प्रधान कार्यालय चितवनमा रहेको छ भने केएसबीबीको प्रधान कार्यालय काठमाडौंको ज्ञानेश्वरमा छ।
यस सहकार्यले दुवै संस्थाका ग्राहकहरूको जीवनस्तर उकास्न र वित्तीय सशक्तिकरणमा योगदान पुर्याउने अपेक्षा गरिएको छ।
