काठमाडौं : हाल सक्रिय रहेको ‘मोन्था’ चक्रवातका कारण देशका अधिकांश भागमा शनिबार बिहानसम्म वर्षा हुने मौसमविद्हरूले जनाएका छन्। जल तथा मौसम विज्ञान विभागका अनुसार विशेषगरी कर्णाली र सुदूरपश्चिम प्रदेशमा छिटपुट वर्षा हुने सम्भावना छ भने अन्य प्रदेशहरूमा मध्यम खालको वर्षा देखिने अनुमान गरिएको छ।
विभागकी प्रवक्ता विभूति पोखरेलका अनुसार शनिबार बिहानदेखि मात्र मौसममा सुधार आउने अपेक्षा गरिएको छ। उनले आगामी २४ घण्टासम्म काठमाडौं उपत्यका र वरपरका क्षेत्रमा पनि वर्षा हुने जानकारी दिइन्। यद्यपि, सबै स्थानमा लगातार वर्षा भने नहुने स्पष्ट पारिएको छ।
यसैबीच, कोशी, बागमती, गण्डकी र कर्णाली प्रदेशका उच्च पहाडी तथा हिमाली क्षेत्रहरूमा एक-दुई स्थानमा भारी हिमपातको सम्भावना रहेको विभागले जनाएको छ। मौसमको यो अवस्थाले जनजीवनमा असर पार्न सक्ने भएकाले सतर्कता अपनाउन विभागले आग्रह गरेको छ।
