काठमाडौँ : चालु आर्थिक वर्ष २०८२/८३ को पहिलो त्रैमासमा वीरगञ्ज नाकाहुँदै ४ अर्ब ६१ करोड रुपैयाँ बराबरको खाद्यान्न आयात गरिएको छ । यो रकम अघिल्लो आवको सोही अवधिको तुलनामा १ अर्ब ५६ करोड बढी हो ।
उक्त नाका हुँदै साउनदेखि असोज महिनासम्ममा धान, चामल, मकै, माल्ट लगायतका १६ वटा खाद्यान्न वस्तु आयात गरिएका हुन् । गत आवको पहिलो त्रैमासमा ३ अर्ब ४ करोड रुपैयाँ बराबरका १६ थरिका खाद्यान्न आयात भएको थियो ।
चालु आवमा वीरगञ्ज नाकाहुँदै सबै भन्दा बढी मकै आयात भएको छ । उक्त अवधिमा १ अर्ब ८० करोड मूल्य पर्ने ३ करोड ३६ लाख १२ हजार ८ सय १० किलोग्राम मकै आयात भएको छ ।
गत आवमा भने १ अर्ब ९ करोड मूल्य बराबरको २ करोड १६ लाख २७ हजार ९ सय ९२ किलोगाम मकै आयात भएको थियो । यस्तै चालु आवको तीन महिनामा १ अर्ब ४६ करोड रुपैयाँ बराबरको ३ करोड ९१ लाख १ हजार ३ सय ४२ किलोग्राम धान आयात भएको छ ।
