काठमाडौं : नेपाली बजारमा सोमबार सुनचाँदीको मूल्यमा वृद्धि भएको छ। नेपाल सुनचाँदी व्यवसायी महासंघका अनुसार आज सुनको मूल्य प्रतितोला २ लाख ४१ हजार ५ सय रुपैयाँ पुगेको छ, जुन आइतबारको तुलनामा २ हजार ९ सय रुपैयाँले बढी हो।
पछिल्ला पाँच दिनदेखि सुनको मूल्य निरन्तर उकालो लागिरहेको छ। कात्तिक १९ गते प्रतितोला २ लाख ३७ हजार २ सय रुपैयाँमा कारोबार भएको सुन हालसम्म ४ हजार ३ सय रुपैयाँले महँगिएको छ। यद्यपि असोज ३१ गतेको २ लाख ५८ हजार रुपैयाँको रेकर्ड अझै कायम छ।
चाँदीको मूल्य पनि सोमबार बढेको छ। आइतबार प्रतितोला ३ हजार १५ रुपैयाँमा कारोबार भएको चाँदी आज ५० रुपैयाँले बढेर ३ हजार ६५ रुपैयाँमा पुगेको छ। असोज ३१ मा चाँदीको मूल्य ३ हजार ३ सय ५० रुपैयाँसम्म पुगेको थियो।
