काठमाडौँ : बितेका केही दिनदेखि लगातार ओरालो लागिरहेको सुनचाँदीको मूल्यमा साताको अन्तिम दिन शुक्रबार भने ठूलो उछाल आएको छ। स्थानीय बजारमा लगातार चार दिनसम्म घटेको सुनको मूल्य आज एकैपटक प्रतितोला २ हजार ७ सय रुपैयाँले वृद्धि भएको हो।
नेपाल सुनचाँदी व्यवसायी महासंघले सार्वजनिक गरेको विवरण अनुसार, आजको उच्च वृद्धिसँगै छापावाल सुनको मूल्य प्रति तोला २ लाख ८७ हजार ४ सय रुपैयाँ पुगेको छ। यसअघि बिहीबार सुन प्रतितोला २ लाख ८४ हजार ७ सय रुपैयाँमा कारोबार भएको थियो।
चाँदीको मूल्य पनि आकासियो :
सुनसँगै आज चाँदीको मूल्यमा पनि तीव्र वृद्धि देखिएको छ। महासंघका अनुसार चाँदीको मूल्य तोलामा १ सय ७० रुपैयाँले बढेर ४ हजार ५ सय १० रुपैयाँ कायम भएको छ। हिजो बिहीबार चाँदी प्रतितोला ४ हजार ३४० रुपैयाँमा खरिदबिक्री भएको थियो।
