काठमाडौं : रिलायबल नेपाल लाइफ इन्स्योरेन्स लिमिटेडले आफ्नो संस्थागत सामाजिक उत्तरदायित्व (CSR) अन्तर्गत काठमाडौं इन्स्टिच्युट अफ चाइल्ड हेल्थ (KIOCH) लाई रु. ५० लाख नगद सहयोग प्रदान गरेको छ। बालबालिकाको स्वस्थ र सुरक्षित भविष्य सुनिश्चित गर्ने प्रतिबद्धता अनुरूप कम्पनीले यो सहयोग रकम हस्तान्तरण गरेको हो।

नेपालमा निर्माणाधीन आधुनिक बहु-विशेषज्ञ (Multi-Specialty) बाल अस्पतालको पूर्वाधार विकास तथा गुणस्तरीय बाल स्वास्थ्य सेवा विस्तारमा योगदान पुर्‍याउने उद्देश्यले उक्त सहयोग गरिएको कम्पनीले जनाएको छ। यस ठूलो सहयोगले भविष्यमा उपचारका लागि आउने हजारौं बालबालिका र उनीहरूका परिवारलाई प्रत्यक्ष रूपमा ठूलो स्वास्थ्य लाभ पुग्ने विश्वास लिइएको छ।

सामाजिक विकासमा निरन्तर प्रतिबद्धता

रिलायबल नेपाल लाइफ इन्स्योरेन्सले स्थापनाकालदेखि नै स्वास्थ्य, शिक्षा तथा सामाजिक विकास जस्ता क्षेत्रहरूलाई उच्च प्राथमिकतामा राख्दै समाजप्रतिको आफ्नो जिम्मेवारीलाई निरन्तर सशक्त बनाउँदै आएको छ। "हामी समाजप्रतिको आफ्नो जिम्मेवारीलाई लिएर सधैं गम्भीर छौं। आगामी दिनहरूमा पनि यस्ता सामाजिक तथा मानवीय कार्यहरूमा सहकार्य र योगदानलाई निरन्तरता दिने हाम्रो प्रतिबद्धता रहनेछ," कम्पनीका प्रतिनिधिले बताए।

'रिलायबल लाइफ - सधैंभरिलाई' भन्ने मूल नाराका साथ सेवा प्रदान गर्दै आएको यस बिमा कम्पनीले आगामी दिनहरूमा पनि स्वास्थ्य र शिक्षाको क्षेत्रमा विभिन्न सामाजिक कल्याणकारी कार्यहरू थप विस्तार गर्दै लैजाने लक्ष्य राखेको छ।