काठमाडौँ :  नेपाल प्रेस युनियन बाँकेले १० लाख रुपैयाँ राशिको ‘पत्रकार कल्याणकारी कोष’ स्थापना गर्ने निर्णय गरेको छ। नवनिर्वाचित कार्यसमितिको पहिलो बैठकले श्रमजीवी पत्रकारको पेसागत सुरक्षा र सम्भावित जोखिमलाई ध्यानमा राख्दै सो अक्षयकोष खडा गर्ने निर्णय गरेको हो।

युनियन बाँकेका अध्यक्ष कमल खत्रीका अनुसार समाचार सङ्कलनका क्रममा पत्रकारहरू जुनसुकै बेला दुर्घटना वा अन्य जोखिममा पर्न सक्ने भएकाले आपत्कालीन अवस्थामा राहत तथा सहयोग पुर्याउने मुख्य उद्देश्यले कोष स्थापना गरिएको हो। यसैबीच, एक कार्यक्रमका बीच निर्वाचन समितिका संयोजक केशवराज कोइरालाले नेपाल प्रेस युनियन बाँकेका नवनिर्वाचित पदाधिकारी तथा सदस्यहरूलाई पदबहाली तथा प्रमाणपत्र वितरण गर्नुभएको युनियनका सचिव भीष्म लोधले जानकारी दिनुभयो।