काठमाडौँ : पोखरा अन्तर्राष्ट्रिय विमानस्थलबाट आगामी असोज ७ गतेदेखि सुरु हुन लागेको पोखरा–दुबई सीधा हवाई उडानलाई प्रभावकारी र दिगो बनाउन कास्कीका पर्यटन व्यवसायीहरूले विशेष अग्रसरता देखाएका छन्। व्यवसायीहरूको एक टोलीले नेपालका लागि संयुक्त अरब इमिरेट्स (यूएई) का राजदूत अब्दुल्लाह सइद मुबारक जरवान अल शाम्सीसँग भेटघाट गरी उडानको निरन्तरता, सहकार्य र आगामी रणनीतिबारे विस्तृत छलफल गरेका छन्।

नेपाल नागरिक उड्डयन प्राधिकरणले फ्लाई दुबईलाई दैनिक उडानका लागि अनुमति दिइसकेको छ। एयरलाइन्सले सुरुमा एक महिनाका लागि दैनिक एक उडान गर्ने घोषणा गरे तापनि हाल सन् २०२७ को मार्चसम्मकै लागि टिकट बुकिङ खुला गरिसकेको छ। यसअघि सरकारले नीति तथा कार्यक्रममार्फत अन्तर्राष्ट्रिय वायुसेवाहरूलाई आकर्षित गर्ने घोषणा गरेअनुरूप यो ऐतिहासिक उडान सम्भव भएको हो।

विश्वकै प्रमुख हवाई ट्रान्जिट हब मानिने दुबईसँग पोखरा सीधा जोडिएपछि गण्डकी प्रदेश र आसपासका यात्रुहरूका लागि अन्तर्राष्ट्रिय यात्रा अत्यन्त सहज हुनेछ। यो उडानमार्फत यात्रुहरूले दुबई हुँदै लन्डन, न्युयोर्क, टोकियोजस्ता विश्वका २५० भन्दा बढी प्रमुख सहरहरूसम्मको सहज हवाई पहुँच प्राप्त गर्नेछन्। यसले काठमाडौँको त्रिभुवन अन्तर्राष्ट्रिय विमानस्थलमा रहेको अत्यधिक हवाई चापलाई विकेन्द्रीकरण गर्न समेत ठूलो मद्दत पुर्‍याउनेछ।

सञ्चालनमा आएको लामो समय बितिसक्दासमेत पोखरा अन्तर्राष्ट्रिय विमानस्थलबाट नियमित अन्तरदेशीय उडान हुन सकेको थिएन। यसअघि सञ्चालित पोखरा–ल्हासा व्यावसायिक उडान यात्रु अभावका कारण रोकिन पुगेको थियो भने चीन, भारत र भुटानका लागि चार्टर्ड उडानहरू मात्रै सीमित थिए। त्यसैले पोखरा–दुबई उडान यस विमानस्थलको दोस्रो र निकै महत्त्वपूर्ण व्यावसायिक अन्तर्राष्ट्रिय उडानका रूपमा रहेको छ।

यस सीधा उडानले नेपालको पर्यटकीय राजधानी पोखरामा वैदेशिक पर्यटकहरूको आगमनलाई उल्लेख्य रूपमा बढाउने अपेक्षा गरिएको छ। साथै, वैदेशिक रोजगार, उच्च शिक्षा र भ्रमणका लागि खाडी मुलुक तथा अन्य देश जाने नेपाली यात्रुहरूका लागि यो सेवा निकै लाभदायी हुनेछ। उडानलाई निरन्तर रूपमा सञ्चालन गर्न सरकारी, कूटनीतिक र निजी क्षेत्रको एकीकृत प्रयास आवश्यक रहेको सरोकारवालाहरूले जोड दिएका छन्।