काठमाडौँ : मुक्तिनाथ विकास बैंक लिमिटेडले ‘नाडा अटो शो २०२६’ (NADA Auto Show 2026) लाई लक्षित गर्दै ग्राहकहरूका लागि आकर्षक र सहज अटो लोन (सवारी कर्जा) योजना ल्याएको छ। "सपना जस्तो गाडी अब छ हातको पहुँचमा" भन्ने नाराका साथ बैंकले नयाँ तथा पुराना सवारीसाधन खरिद गर्न चाहने सेवाग्राहीहरूका लागि यो विशेष अफर सार्वजनिक गरेको हो।

यस कर्जा योजनाअन्तर्गत ग्राहकहरूले वार्षिक मात्र ५.५४ प्रतिशत ब्याजदरमा सवारी कर्जा प्राप्त गर्न सक्नेछन्। बैंकले आफ्नो आधार दर (Base Rate) मा शून्य प्रतिशत प्रिमियम थप गरी यो कर्जा सुविधा उपलब्ध गराउने घोषणा गरेको छ। अटो शोलाई ध्यानमा राखेर ल्याइएको यो अफर २०८३ साल भदौ मसान्तसम्मका लागि मात्र लागू हुने बैंकले जनाएको छ।

बैंकले कर्जा स्वीकृति प्रक्रियालाई अत्यन्त छिटो र पारदर्शी बनाएको छ। आवश्यक सम्पूर्ण कागजातहरू पूरा भएको २४ घण्टाभित्रै कर्जा उपलब्ध गराइनेछ। यसका साथै, बैंकले सवारीसाधन खरिदका लागि कर्जाको दायरा समेत तोकेको छ— जसअन्तर्गत नयाँ सवारीसाधन खरिद गर्दा इन्भोइस मूल्यको ५० प्रतिशतसम्म र पुराना सवारीसाधनको हकमा मूल्याङ्कन रकमको ५० प्रतिशतसम्म कर्जा सुविधा प्राप्त हुनेछ।

यो कर्जाको अधिकतम भुक्तानी अवधि ७ वर्षसम्म रहनेछ। न्यूनतम कागजात र छरितो प्रक्रियाबाटै कर्जा प्राप्त गर्न सकिने भएकाले नयाँ वा पुरानो गाडी किन्ने सोचमा रहेका ग्राहकहरूका लागि यो योजना निकै लाभदायी हुने देखिन्छ।

देशभर रहेका मुक्तिनाथ विकास बैंकका १७६ वटै शाखामार्फत ग्राहकहरूले यो विशेष अटो लोन सुविधाको फाइदा लिन सक्नेछन्। नाडा अटो शोमा सहभागी हुने वा नयाँ/पुराना सवारीसाधन खरिद गर्ने योजना बनाएका इच्छुक व्यक्तिहरूले बैंकको नजिकैको शाखा वा आधिकारिक सम्पर्क नम्बर ०१-५९७०५९५ मा सम्पर्क गरी सुविधा प्राप्त गर्न सक्नेछन्।