काठमाडौँ : रसुवाको भोटेकोशी नदीमा आएको विनाशकारी बाढीका कारण ठूलो संख्यामा मानिसहरू सम्पर्कविहीन भएका छन्। प्रहरीका अनुसार विदेशी पर्यटक, विभिन्न कार्यालयका कर्मचारी र स्थानीय गरी कुल ४ हजार ४ सय ७२ जना अझै बेपत्ता छन्।

केन्द्रीय प्रहरी प्रवक्ता अविनारायण काफ्लेले दिएको जानकारी अनुसार बेपत्ता हुनेमा २५ जना सुरक्षाकर्मी समेत परेका थिए। तीमध्ये तीन जना प्रहरीको शव भेटिएर सनाखत भइसकेको छ।

विभिन्न क्षेत्रमा ठूलो क्षति र बेपत्ताको विवरण:

सरकारी तथा निजी क्षेत्रका कर्मचारी: भन्सार कार्यालयका १५, अध्यागमनका ४, विभिन्न आठ वटा बैंकका २६, लाङटाङ राष्ट्रिय निकुञ्जका ३ र आठ वटा हाइड्रोपावर आयोजनाका ९ सय ३३ जना कर्मचारी सम्पर्कविहीन छन्।

पर्यटक तथा जनप्रतिनिधि: बाढीमा ७ सय ४५ जना आन्तरिक तथा बाह्य पर्यटक हराइरहेका छन्। गोसाइँकुण्ड गाउँपालिकाका उपाध्यक्षसहित केही स्थानीय जनप्रतिनिधि पनि सम्पर्कमा आएका छैनन्।

जिल्लागत विवरण: रसुवाबाट ५ सय ६२, नुवाकोटबाट १ सय १५, मकवानपुरबाट ६५, सिन्धुपाल्चोकबाट २ सय २५, काठमाडौँ उपत्यकाबाट ४ सय ८१ र कोशी प्रदेशका विभिन्न स्थानबाट १ सय ३८ जना बेपत्ता भएका छन्।

उद्धार प्रयास र भौतिक क्षति

विपद प्रभावित क्षेत्रहरूमा हालसम्म ७ सय ३५ जनाको शव फेला परिसकेको छ। सनाखत हुन नसकेका शवहरूको अन्तर्राष्ट्रिय मापदण्ड अनुसार अस्थायी व्यवस्थापन भइरहेको छ।

खोज तथा उद्धार कार्यका लागि ७ हजार ८ सय ८९ जना सुरक्षाकर्मी र स्वयंसेवक खटाइएको छ। हाल टिमुरे, स्याफ्रुबेँसी र रसुवागढी क्षेत्रमा पुरिएका घर तथा शवको खोजी भइरहेको छ भने हाइड्रोपावरका सुरुङभित्र अड्किएकाहरूको पनि तीव्र रूपमा उद्धार प्रयास जारी छ।

यसैबीच, बाढी र पहिरोका कारण पृथ्वी राजमार्गसमेत प्रभावित भएको छ। धादिङको रोराङ गाउँपालिका–७ स्थित कृष्णभीरमा करिब सात मिटर सडक भासिएपछि राजमार्ग पूर्ण रूपमा अवरुद्ध बनेको छ। बाढीले गल्छी क्षेत्रमा चार वटा घर बगाएको छ भने अन्य आठ वटा घर उच्च जोखिममा परेका छन्।