काठमाडौँ : माछापुच्छ्रे बैंक लिमिटेडले आफ्नो २८ औँ वार्षिक साधारणसभा आह्वान गरेको छ। सञ्चालक समितिको हालै बसेको बैठकले आगामी असोज २८ गते पोखराको पार्दीस्थित होटल पोखरा ग्रान्डमा बिहान ११ बजे सभा आयोजना गर्ने निर्णय गरेको हो।
यस साधारणसभाले गत आर्थिक वर्ष २०८२/८३ को मुनाफाबाट चुक्तापुँजीको कुल ६ प्रतिशत लाभांश वितरण गर्ने प्रस्ताव पारित गर्नेछ। बैंकले ३ प्रतिशतका दरले हुन आउने ३६ करोड २५ लाख ८६ हजार ३४७ रुपैयाँ बराबरको बोनस शेयर र ३ प्रतिशत नै (करसहित) ३६ करोड २५ लाख ८६ हजार ३४७ रुपैयाँ बराबरको नगद लाभांश दिने निर्णय गरेको छ।
यसका साथै, सभामा अन्य महत्त्वपूर्ण एजेन्डाहरू पनि प्रस्तुत गरिनेछ:
-
अग्राधिकार शेयर लाभांश : गत आर्थिक वर्षका लागि अग्राधिकार शेयरधनीहरूलाई ८.२५ प्रतिशतका दरले हुन आउने ७ करोड ४५ लाख ८९ हजार ४१ रुपैयाँ नगद लाभांश (करसहित) अनुमोदन गरिनेछ।
-
सञ्चालक निर्वाचन : सञ्चालक समितिमा संस्थापक समूहबाट ३ जना र सर्वसाधारण समूहबाट १ जना गरी कुल ४ जना सञ्चालकको निर्वाचन हुनेछ।
-
प्रबन्धपत्र संशोधन : बैंकको प्रबन्धपत्र तथा नियमावलीमा आवश्यक संशोधनका लागि नियमनकारी निकायबाट प्राप्त हुने निर्देशन अनुसार काम गर्न सञ्चालक समितिलाई पूर्ण अख्तियारी दिइनेछ।
-
वित्तीय प्रतिवेदन र लेखापरीक्षक : गत आर्थिक वर्षको वार्षिक तथा लेखापरीक्षकको प्रतिवेदन स्वीकृत गर्नुका साथै चालु आर्थिक वर्ष २०८३/८४ का लागि नयाँ लेखापरीक्षक नियुक्ति र पारिश्रमिक तोकिनेछ।
बुक क्लोज मिति :
बुक क्लोज मिति : असोज १२ गते।
असोज ११ गतेसम्म नेपाल स्टक एक्सचेन्ज (नेप्से) मा कारोबार भई कायम रहेका सेयरधनीहरू मात्र लाभांश प्राप्त गर्न र साधारणसभामा सहभागी हुन योग्य हुनेछन्।
