काठमाडौं : बझाङबाट काठमाडौं आउँदै गरेको नाइट बस कपिलवस्तुमा दुर्घटना भएको छ। आज विहान ५ बजे कपिलवस्तुको शिवराज नगरपालिका ३ देउराली मोडमा ना ६ ख १३३९ नम्बरको नाइट बस दुर्घटना भएको हो।
बसमा ४० जना यात्रु सवार थिए र दुर्घटनामा परी ६ जना घाइते भएको जिल्ला प्रहरी कार्यालय कपिलवस्तुले जानकारी दिएका छन्। घाइतेहरू मध्ये १ पुरूष र १ महिलाको अवस्था मध्यम र अन्य ४ जनाको अवस्था सामान्य रहेको प्रहरीले जानकारी दिएका छन्।
प्रहरीका अनुसार घाइतेहरुलाई उद्वार गरी उपचारको लागि सन्जिबनी हस्पिटलमा लगिएको छ।तीव्र गति र मोड भएका कारण दुर्घटना भएको जिल्ला प्रहरी कार्यालयले बताएका थिए। दुर्घटना भएको सूचना प्राप्त भएको ५ मिनेटमै प्रहरी घटनास्थलमा पुगेर घाइतेलाई उद्धार गरी अस्पताल पठाइएको थियो।
दुर्घटनापछि बसका चालक भने फरार रहेका छन्। प्रहरीले सहचालकसँग दुर्घटनाबारे सोधपुछ गरिरएको छ र फरार चालकको खोजीकार्य भइरहेको छ।
