काठमाडौँ : अविरल वर्षासँगै आएको बाढी र पहिरोले काठमाडौं उपत्यकाको जनजीवनलाई गम्भीर रुपमा प्रभावित गरेको छ।
मुख्य राजमार्गहरुमा क्षति पुग्दा अत्यावश्यक दैनिक उपभोग्य वस्तुहरूको आपूर्तिमा अवरोध उत्पन्न भएको छ। फलस्वरूप बजारमा महँगी बढेको र वस्तुहरूको अभाव देखा परेको छ। पेट्रोलियम पदार्थ, तरकारी, आलु ,प्याज, दूध लगायतका सामग्रीहरूको नियमित आपूर्ति प्रभावित भएको छ।
धेरैजसो सडक मार्ग अवरुद्ध भएपछि बाहिरी जिल्लाबाट खाद्यान्न, तरकारी, फलफूल लगायतका सामग्री काठमाडौंसम्म आइपुग्न नसकेको हो। बाढीले तरकारी बजार र गोदामहरू डुबानमा परेका छन। जसले ठूलो परिमाणमा वस्तुहरू नष्ट गरेको छ।
यसका साथै इन्धन आपूर्तिमा पनि समस्या आएकोछ। यद्यपि अहिले एकतर्फी रुपमा सडक मार्ग खुल्न थालेको छ।
सडक अवरोधका कारण जनजीवनमा परेको असरलाई कम गर्न विभिन्न निकायहरूले प्रयास गरिरहेका छन्। पूर्णरूपमा स्थिति सामान्य हुन केही समय लाग्ने देखिन्छ।
