काठमाडौँ : ब्याचलर अफ कम्प्युटर एप्लिकेसन (बीसीए) कार्यक्रम नेपालमा कम्प्युटर एप्लिकेसन डिजाइन र विकास गर्ने सीप प्रदान गर्ने एक महत्त्वपूर्ण पाठ्यक्रम हो। त्रिभुवन विश्वविद्यालय अन्तर्गत चार वर्षे, आठ सेमेस्टरको यो कोर्सले एप्लिकेसन निर्माण र आईटी क्षेत्रमा दक्ष जनशक्ति उत्पादन गर्नमा योगदान पुर्याउँछ। नेपालमा प्राविधिक शिक्षाको माग बढ्दै गएकाले बीसीएलाई रोजगारी र करियरको राम्रो विकल्प मानिन्छ।
बीसीए त्रिवि मानविकी संकाय अन्तर्गत सञ्चालित भए पनि यसले प्राविधिक दक्षता प्रदान गर्ने भएकाले यसका विद्यार्थीलाई एप्लिकेसन डेभलपमेन्ट, वेब डिजाइन, मोबाइल एप्स, बैंकिङ, टेलिकम, ई–कमर्स र नेटवर्किङमा भविष्य बनाउने अवसर प्राप्त हुन्छ। बीसीए अध्ययन गर्नका लागि प्लस टूमा जुनसुकै विषय लिएको भए पनि कम्तीमा २.० जीपीए र डी प्लस ग्रेड अनिवार्य छ। प्रवेश परीक्षा उत्तीर्ण गरेपछि मात्र यस कोर्समा भर्ना हुन पाइन्छ।
बीसीए कोर्सको कुल शुल्क ४ देखि ८ लाख रुपैयाँसम्म पर्न सक्छ, जुन कलेजको सुविधाअनुसार फरक-फरक हुन्छ। यस कोर्समा कम्प्युटर प्रोग्रामिङ, वेब टेक्नोलोजी, कम्प्युटर नेटवर्किङ, ग्राफिक्स र एनिमेसन, साइबर कानुन, सी प्रोग्रामीङ, मोबाइल प्रोग्रामिङ लगायतका विषयहरू पढाइन्छ। अध्ययनका क्रममा तीन महिनाको अनिवार्य इन्टर्नसिपसमेत गराइन्छ, जसले विद्यार्थीलाई व्यावहारिक अनुभव दिन्छ।
त्रिभुवन विश्वविद्यालय, पूर्वाञ्चल विश्वविद्यालय र पोखरा विश्वविद्यालयसँग सम्बन्धन प्राप्त देशभरका १ सय २४ कलेजहरूले यो कोर्स सञ्चालन गर्दै आएका छन्। बीसीए पूरा गरेपछि विद्यार्थीहरूले कम्प्युटर एन्ड इन्फर्मेसन सिस्टम म्यानेजर, आईटी अफिसर, नेटवर्क एडमिनिस्ट्रेटर, इथिकल ह्याकर, वेब डेभलपर र ग्राफिक डिजाइनरको रूपमा रोजगार प्राप्त गर्न सक्छन्। यो कोर्सले विद्यार्थीहरूलाई उच्च शिक्षा, जस्तै मास्टर्स इन कम्प्युटर एप्लिकेसन (एमसीए) वा एमएससी आईटीतर्फ पनि जाने बाटो खोल्दछ।
