काठमाडौँ : त्रिभुवन विश्वविद्यालयको ५०औं दीक्षान्त समारोह आगामी पुस १३ गते काठमाडौंको त्रिपुरेश्वरस्थित दशरथ रंगशालामा बिहान १०:०० बजे हुने भएको छ। समारोहमा सहभागी हुने विद्यार्थीहरूले त्रि.वि.द्वारा प्रदान गरिएको गाउन, स्कार्फ र टोपी अनिवार्य रूपमा लगाई तोकिएको समयभन्दा अघि नै समारोह स्थलमा उपस्थित हुनु पर्नेछ।
विशेष जानकारी:
- विद्यावारिधि (Ph.D.) र पदक/पुरस्कार प्राप्त गर्ने विद्यार्थीहरू: सबभन्दा अगाडिको पंक्तिमा आफ्नो नाम लेखिएको सिटमा बस्नुपर्नेछ।
- गाउन/स्कार्फ/टोपी लिने प्रक्रिया:
- २०८१ साल पुस ५ देखि पुस ११ गतेसम्म (बिदाको दिन समेत) गाउन, स्कार्फ र टोपी लिन सकिनेछ।
- समारोहको दिन गाउन/स्कार्फ/टोपी वितरण गरिने छैन।
- गाउन लिन आउँदा अनलाइन फर्म भरिएपछि प्राप्त गाउन कलेक्शन फाराम अनिवार्य रूपमा ल्याउनुपर्नेछ।
पोशाक सम्बन्धी निर्देशन:
- छात्रहरूका लागि: कोट, पाइन्ट, टाई, भादगाउँले टोपीसहित त्रि.वि.ले उपलब्ध गराएको गाउन, स्कार्फ, टोपी लगाउनुपर्नेछ।
- छात्राहरूका लागि: औपचारिक पोशाक वा साडी, ब्लाउजमा त्रि.वि.ले उपलब्ध गराएको गाउन, स्कार्फ, टोपी अनिवार्य लगाउनुपर्नेछ।
प्रमाणपत्र वितरण:
- प्रमाणपत्र लिन अनलाइन फारम भरिएपछि प्राप्त भएको Ceremony Slip अनिवार्य रूपमा ल्याउनुपर्नेछ।
- प्रमाणपत्र वितरण समारोहकै दिन दशरथ रंगशालाको उत्तरपट्टि रहेको श्री नेपाली सैनिक प्रधान कार्यालयस्थित प्रमाणपत्र वितरण काउन्टरमा हुनेछ।
- प्रमाणपत्र लिनका लागि विद्यार्थीले SMS मा प्राप्त जानकारी अनुसार तोकिएको काउन्टरमा सम्पर्क गर्नुपर्नेछ।
समारोहमा अनुपस्थित भएमा:
दीक्षान्त समारोहमा उपस्थित हुन नसकेका विद्यार्थीहरूले प्रमाणपत्र पछि त्रि.वि. परीक्षा नियन्त्रण कार्यालय, बल्खुस्थित रेकर्ड्स तथा प्रमाणपत्र महाशाखाको कोठा नं. ३ बाट प्राप्त गर्न सक्नेछन्।
दीक्षान्त समारोह त्रिभुवन विश्वविद्यालयको ५० वर्षे योगदानको प्रतीकस्वरूप विशेष उत्साहका साथ मनाइने अपेक्षा गरिएको छ।
