काठमाडौँ : रेनोले नयाँ पुस्ताको डस्टरको "सोल अफ डकार" संस्करण सार्वजनिक गरेको छ। यो एक शो कार हो, तर कम्पनीका प्रमुख कार्यकारी अधिकृतले भविष्यमा यसलाई शोरुम मोडलका रूपमा प्रस्तुत गर्न सकिने संकेत गरेका छन्। नयाँ रेनो डस्टर २०२५ मा लन्च हुने अपेक्षा गरिएको छ।
नयाँ डस्टर सीएमएफ-बी प्लेटफर्ममा आधारित छ र अफरोडिङ क्षमतालाई विशेष ध्यानमा राखेर डिजाइन गरिएको छ। यसमा वाई-आकारको एलईडी हेडलाइट, भर्टिकल एयर इनलेट, नयाँ फ्रन्ट बम्पर, स्क्वायर ह्विल आर्च र भी-आकारको टेललाइट जस्ता आकर्षक डिजाइन समावेश गरिएको छ।
डस्टर अब ५ र ७ सिटका विकल्पमा उपलब्ध हुनेछ, जसको लम्बाइ ४ हजार ३ सय ४० एमएम र ह्विलबेस २ हजार ६ सय ५७ एमएम हुनेछ।
गाडीको भित्री भागमा डबल लेयर ड्यासबोर्ड राखिएको छ, जसमा ७ इन्च र १०.१ इन्चका डिजिटल स्क्रिन उपलब्ध छन्। यो एसयूभीमा वायरलेस चार्जिङ, वायरलेस एन्ड्रोइड अटो र एप्पल कारप्ले, अटोमेटिक क्लाइमेट कन्ट्रोल र अर्कामिस थ्रीडी साउन्ड सिस्टम जस्ता प्रिमियम फिचर प्रदान गरिएका छन्।
सुरक्षाका लागि, अटोमेटिक इमरजेन्सी ब्रेकिङ र एडभान्स ड्राइभर असिस्टन्स सिस्टम (एडास) जस्ता आधुनिक प्रविधिहरू उपलब्ध हुनेछन्।
इन्जिन विकल्पका रूपमा, नयाँ डस्टरमा तीन इन्जिन उपलब्ध हुने अपेक्षा गरिएको छ:
- १.३ लिटर टर्बो पेट्रोल: जसले १ सय ५४ बीएचपी पावर उत्पादन गर्नेछ।
- १.० लिटर टर्बो पेट्रोल
- १.२ लिटर हाइब्रिड पेट्रोल: जसले १ सय ७० बीएचपी पावर र २ सय एनएम टर्क उत्पादन गर्नेछ।
यी इन्जिनहरूलाई ५-स्पिड गियरबक्समा ट्युन गरिनेछ।
नयाँ रेनो डस्टरको प्रारम्भिक मूल्य लगभग २० लाख भारु हुने अनुमान गरिएको छ। भारतीय बजारमा यो गाडीले हुन्डाई क्रेटा, किया सेल्टोस, टाटा ह्यारियर, स्कोडा कुशाक र मारुती ग्रान्ड भिटारा जस्ता लोकप्रिय एसयूभीहरूसँग प्रतिस्पर्धा गर्नेछ।
